بيىل اتىراۋ قالاسىندا وتكەن «ماڭگىلىك ەلدىڭ التىن ادامى» اتتى رەسپۋبليكالىق تەاترلار فەستيۆالىندە, اباي تەاترىنىڭ ديرەكتورى باۋىرجان تۇلەكوۆ باستى ءرولدى سومداپ, «اداسقان باق قۇسى» سپەكتاكلىندەگى ەڭبەگى ءۇشىن «ەڭ ۇزدىك ەر ادام بەينەسى» نوميناتسياسىنا يە بولدى. سونىمەن قاتار تەاترىڭ اكتەرى ساپاربەك اشىمبەكوۆ «ەڭبەك ارداگەرى» مەدالىمەن ماراپاتتالىپتى. بيىل تەاتر ءوزىنىڭ 84-ءشى ماۋسىمىن ءسۇلتانالى بالعاباەۆتىڭ كومەديالىق جانرداعى «ەڭ جاقسى ەركەك» شىعارماسىمەن اشتى. رەجيسسەر سۇلتان سرايلوۆ قويعان سپەكتاكل كورەرمەن ىقىلاسىنا بولەنىپ, ءوزىنىڭ جوعارى باعاسىن الدى. اۆتور پەسادا قازىرگى قوعامداعى وزەكتى پروبلەمانى استارلى ازىلمەن جەتكىزۋگە تىرىسقان. وقيعا الپان كەيىپكەردىڭ بويجەتكەندەرگە كوز سالۋى, ءسوز سالۋى ارقىلى ء وربىپ, «بايشەشەك» كلۋبىنىڭ ءبىر توپ قىزدارى وسى ماسەلەنى شەشۋ ماقساتىندا ءىس-ارەكەتكە كوشەدى.
ساحنادا الپاننىڭ قوناق بولمەسى. سۋرەتشى ناتاليا ەرچيحينا وقيعا بارىسىنا سايكەستەندىرىپ, زاتتاردى ىڭعايلى ەتىپ ورنالاستىرعان. سونىمەن قاتار اكتەرلەردىڭ كيىمىن دە وبرازعا ساي تاڭدالىپ, كەيىپكەر حاراكتەرىن اشۋعا سەپتىگىن تيگىزۋدە.
العاشقى كورىنىستە رەجيسسەر الپان مەن گۇلمايداننىڭ باقىتتى, قۋانىشتى ءومىرىن بەينەلەيدى, كەيىن «بايشەشەك» كلۋبىنىڭ قىزدارى كەلگەن ساتتەن الپاننىڭ قۇپياسى اشىلا باستايدى. باستى رولدەگى ازامات نۇرعامىس پەن سۇلۋشاش تولەكوۆا اراسىنداعى اكتەرلىك دۋەت قويىلىم دەڭگەيىن ارتتىرا ءتۇستى. ا.نۇرعامىس بىردە سالماقتى دەپۋتات, جىگىتتىڭ سۇلتانى بولسا, بىردە ءمادينا-ماگدالينا باسىن دۋالاعان ساتتەن ايەل جاندى ەركەك بولىپ شىعا كەلەدى. بۇل كورىنىس ارقىلى اكتەر ءوزىن سان قىرىنان كورسەتە بىلگەن. بۇعان دەيىن دە كومەديا جانرىنداعى «سوتانايدىڭ سوڭعى ۇيلەنۋى»(و.بورانباەۆ), «ۇيلەنۋ» (ە.جۋاسبەك) ت.ب سپەكتاكلدەردە ويناپ, اكتەرلىك شەبەرلىگىن شىڭداي ءتۇستى. ال, گۇلمايدان رولىندەگى سۇلۋشاش تولەكوۆا كەيىپكەر كەلبەتىنە ساي ەرەكشەلىكتى, ءار ءىس-قيمىلدى نانىمدى ويناپ, جوعارى دەڭگەيدە الىپ شىقتى.
- ارينە قويىلىمدا باستى جۇك اكتەرگە تۇسەدى. اۆتور ويىن, رەجيسسەر يدەياسىن, بارلىعىن ۇشتاستىرىپ الىپ شىعۋ جاۋاپتىلىعى اكتەرگە جۇكتەلەدى,-دەيدى ادەبيەت ءبولىمىنىڭ مەڭگەرۋشىسى ەڭلىك ساماتوۆا,-باقىت تويىمباەۆا باستاعان «بايشەشەك» كلۋبىنىڭ ءبىر توپ قىزدارى سپەكتاكلدىڭ كوركىن كىرگىزۋدە. قانداي قويىلىم بولماسىن, ءتىپتى ەكىنشى پلانداعى كەيىپكەردى ويناسا دا كوزگە تۇسەتىن دامەتكەن يدريسوۆا, بۇل جولى ەكستراسەنس-ەمشى ءرولىن سومادادى. وزىنە بەرىلگەن ءرولدى اسقان شەبەرلىكپەن ورىنداپ, ەرەكشەلەندىرىپ كورسەتۋگە تىرىسادى. سونداي تالانتتى اكتريسالاردىڭ ءبىرى نازىم مۇراتحانوۆا. ونىڭ كەسكىن-كەلبەتى, سىزىلا سويلەۋى, ءىس-ارەكەتى, كوزقاراسى سىلقىم ايەلگە ءتان قۇبىلىس. اكتريسا كەيىپكەر جانىن بويىنا ءسىڭىرىپ, شەبەر كورسەتە الدى. «بايشەشەك» كلۋبىنىڭ مەڭگەرۋشىسى رولىندەگى باقىت تويمباەۆانىڭ جانە جۋرناليست روزابانۋ رولىندەگى اسەم تۇرلىبەكوۆانىڭ كەيىپكەر سومداۋداعى شەبەرلىگىن سپەكتاكل بارىسىنان اڭعارا الامىز. شىعارمادا وقيعا تۋدىرۋشى كەيىپكەرلەردىڭ ءبىرى - ءلاتيپاجان جانە ءايلاززات. الپانعا عاشىق قىزداردىڭ بىرەۋى ولەڭ جولدارىن ارناعان اقىن بولسا, بىرەۋى مىڭ بۇرالعان ءبيشى. ءلاتيپاجان رولىندەگى اقەركە ريزابەكوۆا قيال الەمىندە جۇرەتىن سەزىمتال قىزدى جوعارى دەڭگەيدە بەينەلەدى. ال, ءايلاززات اتتى كەيىپكەردى ويناعان اياۋلىم تۇرىسبەكوۆانىڭ اكتەرلىك شەبەرلىگى ءبىر بولەك. شىعىس ءبيىن بيلەگەن اكتريسانىڭ پلاستيكاسى, تەمپو-ءريتمى وزگەلەردەن ەرەكشە. جانە رول شىعارۋدا اسا جاۋاپتىلىقپەن قاراپ, دارالانۋعا تىرىسادى.
جالپى رەجيسسەر اكتەرلەرمەن تىعىز جۇمىس جاساي وتىرا, اۆتوردىڭ نەگىزگى يدەياسىن العا تارتىپ, زامانداس بەينەسىن بۇگىنگى قوعامعا كورسەتە بىلگەن ەكەن. كورەرمەننىڭ كوتەرىڭكى كوڭىل-كۇيدە, ۇزدىكسىز سوققان قوشەمەتى سپەكتاكلدىڭ جوعارى دەڭگەيدە وتكەندىگىن اڭعارتتى. اباي اتىنداعى قازاق مۋزىكالىق دراما تەاترى وسىلايشا ساپالى قويىلىمدارىمەن ارقاشان كورەرمەندەرىن قۋانتىپ كەلەدى.
راۋشان نۇعمانبەكوۆا,
سەمەي
سۋرەتتى تۇسىرگەن اۆتور
